Kisii

Kisii, Kenya

Kwa maana nyingine, tazama Kisii (maana).

Jiji la Kisii
Jiji la Kisii Mahali pa mji wa Kisii katika Kenya
Majiranukta: 0°41′0″S 34°46′0″E
Nchi	Kenya
Kaunti	Kisii
Idadi ya wakazi
- Wakazi kwa ujumla	83,460
Tovuti:  www.kisii.com

Kisii ni mji upatikanao Kusini Magharibi mwa Kenya. Huu ndio mji mkubwa wa biashara katika miinuko ya Gusii. Mji huu pia huitwa Bosongo au Getembe

Kisii ndio makao makuu ya Kaunti ya Kisii. Awali ulikuwa makao makuu ya Wilaya ya Kisii kwa ujumla kabla ya wilaya hiyo kugawanywa na kuzaa Wilaya ya Nyamira na Wilaya ya Gucha. Hata hivyo bado mji huo uliendelea kuzifaidi wilaya hizi na Nyanza kusini kwa ujumla, hasa kibiashara.

Uchumi

Kuna shughuli za viwanda katika mji huu na vingi vya viwanda hivi vinahusiana na kilimo kwa kuwa Kisii uko katika eneo lililotawaliwa na ukulima.

Pia kuna uchongaji wa madini katika eneo hili, hasa madini ya soapstone katika eneo la Tabaka.

Elimu

Kutokana na idadi kubwa ya watu (83,460 kadiri ya sensa ya mwaka 2009) na ongezeko la mahitaji ya elimu, vyuo vingi vimeanzisha matawi Kisii. Miongoni mwa vyuo vilivyoanzisha matawi mjini ni:

• Chuo Kikuu cha Nairobi
• Chuo Kikuu cha Masinde Muliro
• Chuo Kikuu cha Egerton
• Chuo Kikuu cha Moi

Licha ya hivyo kuna shule nyingi za sekondari humo mjini, kama vile Shule ya Upili ya Kisii.

Wakazi

Mji huu una wakazi wa matabaka mbalimbali, miongoni mwao wakiwemo Wahindi na Wakikuyu wanaojihusisha na biashara, huku idadi kubwa ikiwa Wakisii.

Hata hivyo, Wahindi wamenunua mali nyingi kutoka kwa Wakisii, ambayo wamekuza kuwa maduka makuu na jambo hili limeukuza mji huu kiajabu hivi karibuni. Leo hii mji huu unajivunia maduka makuu kama Tuskys na Nakumatt, benki kama vile Benki ya Equity, Benki ya Family, K-Rep, Benki ya Cooperative na Benki ya Barclays ambayo yote yameanzisha matawi mjini Kisii.

Hali ya usafi na nyumba

Mji wa Kisii una kiwango cha chini cha usafirishaji wa takataka na maji machafu. Kituo pekee cha kusafisha maji machafu kilikuwa Daraja Mbili lakini kimehamishwa nje ya mji.

Mji huu pia unakumbwa na uhaba wa ardhi huku mitaa mingi mjini ikianzishwa bila mpango maalumu.

Tazama pia

• Orodha ya miji ya Kenya
• Daraja Mbili
• Wakisii
• Wilaya ya Kisii Kati

Viungo vya nje

• Kuhusu Gusii
• Tovuti Rasmi ya Kisii
• Lugha ya Ekegusii Ilihifadhiwa 10 Mei 2007 kwenye Wayback Machine.