Hifadhi ya Taifa ya Nyerere

Eneo la Hifadhi ya Taifa ya Nyerere nchini Tanzania.

Hifadhi ya Taifa ya Nyerere (awali: Selous, matamshi: "saluu") ni hifadhi ya taifa kubwa kuliko yote nchini Tanzania, pia ni kati ya hifadhi ya wanyama kubwa kabisa duniani. Hifadhi imeanzishwa mwaka wa 2019; kabla ya kupandishwa hadhi na kuwa hifadhi, ilikuwa pori tengefu lililojulikana kwa jina la Selous.

Eneo lake ni la km² 54,600 katika mikoa ya Pwani, Morogoro, Lindi, Mtwara na Ruvuma. Eneo hilo ni kubwa kushinda nchi 70 duniani ikikadiriwa kuwa na eneo sawa na nchi ya Kostarika (Amerika ya Kati) na takribani mara mbili kuliko nchi ya Ubelgiji (Ulaya).

Sehemu kubwa ya eneo iko katika hali ya asili bila kuvurugwa na shughuli za binadamu. Tangu mwaka 1982 imeingizwa katika orodha ya UNESCO ya Urithi wa Dunia. Tena mwezi Juni 2014 imeingizwa kwenye orodha ya UNESCO ya hifadhi zenye hatari ya kupotewa na uhai wake.

Katika hifadhi hii pia unapatikana mto mkubwa uitwao Rufiji. Hapo serikali imeanzisha mradi wa uzalishaji umeme mkubwa zaidi katika Afrika Mashariki na ya Kati.

Jina

Jina la Hifadhi ya Taifa ya Nyerere limechaguliwa kwa heshima ya mwanzilishi wa Taifa na Rais wa kwanza wa Tanzania, Mwalimu Julius Kambarage Nyerere.

Jina la awali lilitokana na Mwingereza Frederick Selous aliyekuwa mwindaji wakati wa kuanzishwa kwa ukoloni katika Afrika ya Kusini na Mashariki na ambaye aliuawa katika Tanzania ya leo akiwa mwanajeshi wakati wa Vita Kuu ya Kwanza ya Dunia.

Wanyama na mimea

Hifadhi ya Taifa ya Nyerere ina aina kadhaa za wanyamapori wanaopatikana ndani yake: kati yao ni: simba, nyumbu, twiga, pundamilia, swala,kiboko, kifaru, swala, fisi, mbwa mwitu wa Afrika, na idadi kubwa ya mamba wanaopatikana katika mto Rufiji. Hao wote wanaweza kuonekana wakati wa kutembelea hifadhi hii. Hapo awali hifadhi ya Taifa ya Nyerere (Selous) ilikuwa nyumbani kwa tembo wengi sana lakini kwa sababu ya ujangili uliokithiri idadi imepungua sana.

Namna ya kufika

• Safari kwa kutumia ndege: Hifadhi ya kitaifa ya Nyerere inaweza kufikika kwa urahisi kwa usafiri wa anga na ndege yoyote inayounganisha kutoka Ruaha na Dar es Salaam. Ni takriban dakika 90 kutoka Hifadhi ya Taifa ya Ruaha na dakika 45 kutoka kwa jiji la Dar es Salaam.
• Safari kwa kutumia barabara; unaweza pia kufika kwa barabara na safari inayounganisha kutoka Dar es salaam ambayo au kupitia Hifadhi ya taifa ya Mikumi na kisha ambapo unaweza kuingilia geti la matambwe. Safari hii ambayo inaweza kuchukua kama masaa 4 kufika umbali wa kilomita 220 ni chaguo jingine.
• Safari kwa kutumia njia ya reli; unaweza kutumia usafiri wa reli, kwa reli ya Tanzania na Zambia TAZARA huanza kutoka Dar Es Salaam na kukuchukua hadi Matambwe, ambapo unaweza kupata gari kwa safari yako ya utalii. .

Picha

• 
  Picha ya hifadhi kutoka angani
• 
  Twiga ndani ya Selous
• 
  Tembo
• 
  Wanyama wa Selous
• 
  Ndege
• 
  Selous
• 
  Watalii wakitazama jozi la simba ndani ya Selous
• 
  Ziwa

Tazama pia

• Orodha ya Urithi wa Dunia katika Afrika

Marejeo

Majarida ya hifadhi za Taifa Tanzania

Viungo vya nje

Wikimedia Commons ina media kuhusu:

Hifadhi ya Taifa ya Nyerere

• African World Heritage Sites - Selous Archived 18 Oktoba 2017 at the Wayback Machine.
• Selous Game Reserve
• Tovuti rasmi ya UNESCO