Usafiri wa anga la nje

Kutoka Wikipedia, kamusi elezo huru
Rukia: urambazaji, tafuta
Roketi ya Soyuz TMA-5 ilirushwa uwanja wa anga Baikonur nchini Kazakhstan mnamo 14 Oktoba 2004 kikibeba wanaanga 3 kwenda ISS
Kituo cha anga cha Kimataifa ISS mnamo mwaka 2009

Usafiri wa anga la nje ni kila aina za safari au usafiri inayofikia nje za angahewa ya dunia kwenye anga la nje. Ilhali hakuna mpaka kamili baina ya angahewa na anga la nje kuna mapatano kutazama kimo cha kilomita 100 kama chanzo cha anga la nje.

Chombo cha kwanza kilichofikia juu ya 100 km kilikuwa roketi ya Kijerumani aina ya V-2 katika majaribio ya mwaka 1944.[1] Chanzo cha usafiri wa anga la nje kilikuwa kuruka kwa chombo cha angani cha Kisovyieti Sputnik 1 mnamo 4 October 1957 iliyokuwa satelaiti ya kwanza iliyozunguka dunia angani.

Kiumbehai cha kwanza kilichofikishwa angani la nje alikuwa mbwa Laika kwa njia ya satelaiti ya Sputnik 2. Mtu wa kwanza angani la nje alikuwa Mrusi Yuri Gagarin aliyezunkuka dunia mara moja tarehe 12 Aprili 1961 kwa Vostok 1. Marekani ilifaulu kupeleka watu wa kwanza hadi uso wa mwezi tarehe 20 Julai 1969, hao walikuwa Neil Armstrong na Buzz Aldrin.

Tangu 1986 Umoja wa Kisovyeti ilianza kujenga kituo cha angani MIR kilichofuatwa na Kituo cha Anga cha Kimataifa ISS tangu 1998. Katika vituo hivi wanaanga na wanasayansi kutoka nchi mbalimbali waliweza kukaa angani kwa miezina kufanya utafiti wa mazingira ya anga la nje.

Usafiri wa anga la nje umeendelea kwa kuupeleka vyomba vya angani hadi sayari nyingine. Shabaha ya safari hizi ni upelelezi na utafiti wa kisayansi. Voyager 1 ni chombo cha kwanza kilichotoka katika mfumo wa jua letu mnamo mwaka 2012.

Katika mazingira ya karibu zaidi ya dunia kuna satelaiti nyingi zinazozunguka sayari yetu na kutekeleza kazi za kibiashara kama vile upimaji wa hali ya hewa, kurusha programu za runinga na redio, kutuma data za GPS au za simu.


Marejeo[hariri | hariri chanzo]

  1. "The V2 and the German, Russian and American Rocket Program", C. Reuter. German Canadian Museum. p. 170. ISBN 1-894643-05-4, ISBN 978-1-894643-05-4