Jaribio la kumuua Donald Trump

Jaribio la kumuua Donal Trump, rais wa 45 wa Marekani na mteule wa Chama cha Republican katika uchaguzi wa urais wa 2024, lilifanyika tarehe 13 Julai 2024, wakati wa mkutano wa kampeni za uchaguzi, karibu na mji wa Butler, Pennsylvania. Hata hivyo Donald Trump amenusurika kifo katika jaribio hilo ambapo amepigwa risasi upande wa juu wa sikio lake la kulia.

Aliyefanya jaribio hilo la kumuua alitambuliwa kwa jina la Thomas Matthew Crooks mwenye umri wa miaka 20, mkazi wa Bethel Park, Pennsylvania. Maafisa usalama na mashuhuda walisema kwamba jahili alifyatua risasi kutoka kwenye paa la jengo la jirani ya uwanja wa mkutano kwa kutumia bunduki ya nusu-otomatiki aina ya AR-15, na kufyatua risasi nane kabla ya kuuawa na mdunguaji kutoka Kikosi cha Kijasusi cha Serikali .

Baada ya kupigwa risasi, Trump alichumpa chini na alizingirwa haraka na Maofisa Walinzi ; aliinuka huku akivuja damu nyingi kwenye sikio lake la kulia, akafanya ishara ya kusukuma ngumi hewani mara kadhaa kabla ya kukimbizwa kwenye gari. Kisha alipelekwa hospitali na kuruhusiwa akiwa katika hali nzuri, na baadae akaondoka kwa ndege kwenda New Jersey . Mshiriki mmoja wa mkutano aliuawa, na wengine wawili walijeruhiwa vibaya.

Usuli

Rais wa zamani Donald Trump ndiye mteule wa kugombea urais kupitia chama cha Republican katika uchaguzi wa rais wa Marekani wa 2024 .

Mnamo Julai 5, 2024, ilitangazwa kuwa Trump atapokea maandamano katika Viwanja vya Maonyesho ya Shamba la Butler kati ya mji wa Connoquenessing na Meridian karibu na Butler, Pennsylvania, tarehe 13. Ilifanyika kama sehemu ya kampeni ya urais ya Trump kwa ajili ya uchaguzi ili kuongeza kura katika jimbo la Pennsylvania ; jimbo ambalo lina kura 19 za Makada wa Chama, na kura 270 zinahitajika ili kuchaguliwa kuwa Rais. Mwenyekiti wa Kamati ya Republican ya Kaunti ya Butler James E. Hulings alikadiria watu 50,000 walikuwa kwenye mkutano huo. Mwakilishi Mike Kelly alisema kuwa alijaribu kuwasiliana na kampeni ya Trump kuwa wabadilishe eneo la mkutano huo liwe kwenye eneo ambalo linaweza kumudu umati mkubwa kuliko Uwanja wa Butler Farm Show. Alidai walimjibu kwa kumwambia, "Tunashukuru kwa mchango wako lakini tayari tumesha amua." Shambulio likatokea siku mbili kabla ya kuanza kwa Kongamano la Kitaifa la Republican la 2024 . Mikutano ya Trump huwa inakaguliwa ili kudhibiti vitu vilivyopigwa marufuku, kama silaha.

Mchoro wa ramani unaoonyesha makisio ya eneo la Thomas Matthew Crooks (rangi nyekundu), Donald Trump (rangi nyeusi), na Timu ya Maofisa Usalama (bluu)

Trump alipigwa risasi ikiwa ni takriban saa 12:11 jioni EDT wakati wa mkutano wake wa kampeni. Dakika sita baada ya Trump kuanza kuhutubia, Thomas Matthew Crooks alifyatua risasi nane kwa kutumia bunduki aina ya AR-15 kwenye mkutano huo. Jahili hakufanyiwa uchunguzi wa usalama kwa vile alikuwa nje ya eneo la usalama wa mkutano huo; alikuwa amepanda juu ya paa la jengo, feet 200 hadi 400 (m 61 hadi 122) kaskazini mwa Trump. Mfanya shambulio aliuawa na mdunguaji wa Kikosi cha Kupambana na Mashambulio ya Siri cha Marekani mara baada ya kupigwa risasi.

Shambulio

Siku ambayo jaribio hilo lilifanyika, Thomas Matthew Crooks alimuazima baba yake bunduki aina ya rifle—ya kundi la DPMS Panther Arms - toleo la AR-15– yenye mtutu wa nchi 16 na chemba ya kipimo cha 5.56×45mm NATO, ambayo ingeweza kufanya kazi hiyo kama alivyotaka Crooks. Maofisa wa Serikali Kuu ya Marekani wameieleza silaha hiyo kuwa ni ya kiwango cha kawaida. Baadae akanunua risasi 50 kutoka kwenye duka la silaha na akanunua ngazi ya futi 5 (meta 1.5) kisha akaendesha gari yake kuelekea eneo la mkutano huku akiwa amepakia zana za milipuko. Akapanda juu ya paa la jengo jirani, urefu wa takriban futi 400 (meta 120) kaskazini ya lilipokuwepo jukwaa. Jengo hilo lilikuwa chini ya uangalizi wa maofisa polisi 3, lakini hakukuwa na aliyepangwa kulinda kwa juu kutokana na upungufu wa rasilimali watu wa kiulinzi. Crooks hakupitia ukaguzi wa wanausalama kwa kuwa, kwa mujibu wa maofisa wenyewe, jengo hilo lilikuwa nje ya wigo wao wa uangalizi wa maandamano .Kwa mujibu wa WPXI, Crooks alipigwa picha mara mbili na maofisa usalama kabla ya tukio la ufyatuaji risasi. Kabla ya saa 11.45 jioni, saa za eneo hilo, ofisa wa polisi alimuona Crooks kabla hajapanda juu na alitoa ripoti aliyoambatisha na picha, kuwa ni mtu wa kutilia shaka. Ofisa mwingine akamtafuta Crooks lakini hakumuona. Vyanzo kadhaa vya vyombo vya kiulinzi vya eneo hilo navyo vimeripoti kuwa vilitilia shaka uwepo wa Crooks kwenye eneo lililokuwa na vifaa vya kiteknolojia viitwavyo magnetometers; wakatumia simu ya upepo kuripoti, na kumbukumbu za mawasiliano hayo zimewasilishwa kwa Shirika la Kijasusi.

Saa 11.45 jioni, mmoja wa wanatimu ya Masuala ya Kiufundi Kitengo cha Matukio ya Dharura cha Beaver County, Pennsylvania, alimuona Crooks juu ya paa, akawajulisha maofisa wenzake, na kumpiga picha. Katika moja ya matukio mawili ambayo Crooks alipigwa picha, afisa polisi aliyempiga picha alimuona akiliangalia eneo kama afanyaye mpango fulani akiwa juu ya paa ameshika kifaa cha kuvutia taswira karibu. Makachero wa usalama walimuona Crooks juu ya paa takriban dakika 20 kabla ya tukio la ufyatuaji risasi. Repoti zinaonesha kulikuwa na mashuhuda kadhaa waliomuona na bunduki akiwa juu ya paa wakawafahamisha polisi takriban dakika moja na nusu kabla ya ufyatuaji risasi dhidi ya Trump. Afisa mmoja wa polisi wa mji wa Butler alijaribu kumpandia Crooks juu ya paa alikokuwa, akisaidiwa na afisa mwingine. Crooks akamuona afisa huyo akati mikono ya afisa ikiwa ingali inashikilia kingo za paa, akamlenga na bunduki, na afisa ikambidi ajiachie na kuanguka (meta 2.4) na kujiumiza vibaya kiwiko cha mguu. Crooks akaanzisha shambulio la kutaka kuua punde tu baada ya kukabiliana na afisa huyo.

Iran yakanusha shutuma za kula njama

Siku ya Jumatano ya Julai 17 2024, taifa la Iran limekanusha vikali lilichokiita 'uchokozi' wa dhahiri uliofanywa na vyombo vya habari vya Marekani kwa kulihusisha taifa hilo na njama za kumuua Donald Trump.

Siku ya Jumanne (16 Julai) CNN iliripoti kuwa maafisa wa serikali ya Marekani walipokea taarifa za kiintelijensia kutoka kwa mtu mmoja, wiki chache nyuma, kuwa Iran inaweza kuwa inafanya njama dhidi ya Rais wa zamani wa nchi hiyo, jambo lililochagiza uimarishaji wa ulinzi wa Trump. Mashirika mengine ya utangazaji ya Marekani pia yalitangaza shutuma hizo.

Hata hivyo CNN ilifafanua baadae kuwa shutuma dhidi ya Iran hazihusiani hasa na tukio la kujaribu kumuua Trump. Hali kadhalika Kamati ya Kitaifa ya Ulinzi ya Marekani imesema kuwa kwa miaka mingi, imekuwa ikiifuatilia kwa karibu Iran hasa kutokana na vitisho vya nchi hiyo vya kuulipizia kisasi uliokuwa utawala wa Trump, baada ya utawala huo kufanya shambulizi lililomuua Jenerali wake mwanamapinduzi, Qassam, mwaka 2020.

Taarifa zaidi

Jahili alikuwa hatua moja mbele

Mnamo tarehe 28 Julai, The New York Times liliripoti kuwa mfanya shambulio la bunduki kwenye mkutano wa Trump aliwazidi makachero kimbinu. Kupitia arafa ambazo gazeti hilo ilizipata katika namna ya kipekee, zilionesha kuwa maofisa usalama walikuwa na tetesi juu ya Thomas Crooks mapema zaidi kuliko ilivyokuwa ikifahamika. Naye [Crooks] alilijua hilo.

Pia kuna jambo lipo tofauti: zilipita dakika 90 tangu alipogundulika hadi pale alipouwawa, na si dakika 60 kama maafisa usalama walivyokuwa wakisema kupitia vyombo vya habari. Alionekana kwa mara ya kwanza saa 10.26 jioni. Alipigwa picha kwa mara ya kwanza saa 11.14 jioni na aliuwawa saa 12.11 jioni.

Taarifa zimebainisha kuwa mara nyingi jahili huyo "amekuwa hatua moja mbele" ya maofisa usalama. Bw. Crooks alilipeleleza eneo la mkutano siku moja kabla ya maofisa usalama nao kufanya hivyo. Alitumia droni kufanya upelelezi kwenye eneo hilo wakati maofisa usalama hawakujaribu hata kutafuta idhini ya kufanya hivyo. Crooks alifanya utafiti juu ya umbali aliokuweko Lee Harvey Oswald kutoka alikokuwa John F. Kennedy alipomfanyia mauaji rais huyo wa zamani mwaka 1963 - akapata jibu kuwa ni takriban futi 265 - na alifanikiwa kukwea futi 400 juu ya jengo na kupata ukaribu zaidi na Trump; paa ambalo wana usalama waliliacha bila ulinzi.

Kwa hiyo, wakati wanausalama wanayaangalia maandamano, Crooks alikuwa akiwaangalia wao; na baada ya tukio polisi walipagawa na kujiuliza: alifanyaje fanyaje?!

Kuenea kwa uvumi wa kula njama

Wachambuzi wa masuala ya ulaji njama walijitokeza mapema sana mara baada ya tukio la Trump kunusurika kifo. Wana-nadharia hao wa matukio ya ulaji njama walidai kuwa jaribio hilo la kumuua Donald Trump lilipangwa na ilitumika damu feki.

Ikiwa zimepita dakika chache tu tangu tukio litokee, wana-nadharia hao waliweka machapisho kwenye mitandao ya kijamii hasa ule wa X wakidai kuwa jaribio hilo lilipangwa ili kuchechemua mkakati wa Trump kushinda uchaguzi.