Ketamini

Ketamini (Ketamine) ni dawa inayotumika hasa kwa ajili ya kuanzisha na kudumisha ganzi. Inaleta hali ya kupoteza fahamu huku ikitia nafuu kutokana na maumivu, kutuliza, na kupoteza kumbukumbu. Matumizi yake mengine ni pamoja na kutuliza wagonjwa walio katika uangalizi wa hali ya juu sana (mahututi) na matibabu ya maumivu na unyogovu. Kwa kawaida, utendakazi wa moyo, kupumua, na harakati za njia za hewa zisizohitaji kufikiri kwa ujumla hubakia zikifanya kazi vyema. Athari zake kwa kawaida huanza ndani ya dakika tano inapotolewa kwa njia ya kudungwa sindano, na hudumu hadi takriban dakika ishirini na tano.

Madhara yake ya kawaida ni pamoja na kufadhaika, kuchanganyikiwa, au kuona njozi wakati dawa inaisha. Shinikizo la damu la juu na kutetemeka kwa misuli ni jambo la kawaida. Mikazo ya ghafula ya msuli ya zoloto inaweza kutokea mara chache. Ketamini ni kipinzani cha kipokezi cha NMDA, lakini pia inaweza kuwa na vitendo vingine.

Ketamini iligunduliwa mwaka wa 1962, ikajaribiwa kwa mara ya kwanza kwa binadamu mwaka wa 1964, na kuidhinishwa kutumika nchini Marekani mwaka wa 1970. Ilitumika sana kwa ajili ya kuleta ganzi katika upasuaji katika Vita vya Vietnam kwa sababu ya usalama wake. Dawa hii iko kwenye Orodha ya Dawa Muhimu ya Shirika la Afya Ulimwenguni na inapatikana kama dawa ya kawaida. Bei yake ya jumla katika nchi zinazoendelea ni kati ya US$0.84 na US$3.22 kwa kichupa. Ketamini pia hutumiwa kama dawa ya burudani kwa sababu ya athari zake za kuleta njozi na kutenganisha kati ya watu.