Panzi

Kutoka Wikipedia, kamusi elezo huru

Panzi

Panzi kibyongo, Abisares viridipennis

Uainishaji wa kisayansi

Himaya:	Animalia (Wanyama)
Faila:	Arthropoda (Wanyama wenye miguu yenye viungo)
Nusufaila:	Hexapoda (Wanyama wenye miguu sita)
Ngeli:	Insecta (Wadudu)
Ngeli ya chini:	Pterygota (Wadudu wenye mabawa)
Oda:	Orthoptera (Wadudu wenye mabawa nyofu)
Nusuoda:	Caelifera (Wadudu kama panzi)
Familia:	Acrididae (Panzi)
Nusufamilia:	Acridinae Calliptaminae Catantopinae Brunner von Wattenwyl, 1893 Copiocerinae Amédégnato, 1974 Coptacrinae Brunner von Wattenwyl, 1893 Cyrtacanthacridinae Egnatiinae Eremogryllinae Euryphyminae Eyprepocnemidinae Gomphocerinae Fieber, 1853 Habrocneminae Hemiacridinae Leptysminae Marelliinae Melanoplinae Scudder, 1897) Oedipodinae Walker, 1870) Ommatolampinae Oxyinae Pauliniinae Proctolabinae Rhytidochrotinae Spathosterninae Teratodinae Tropidopolinae

Panzi ni aina ya mdudu anayekula mimea. Panzi waaninishwa katika oda ndogo Caelifera katika oda ya Orthoptera. Wanachupa mbali kwa kutumia miguu yao ya nyuma ambayo ina nguvu sana. Wengi wanaweza kuruka juu. Panzi wana vipapasio vifupi kuliko mwili wao. Panzi wakubwa na ambao wanajikusanya kwenye makundi wanaitwa nzige.

Panzi jike wana maumbile yanayowawezesha kuchimba ardhi na kutaga mayai yao ndani ya vibumba. Vibumba vya mayai huweza kuwa na mayai kumi na tano hadi zaidi ya mia moja. Mayai ya panzi aina nyingi huingia kwa diaposi kupitia majira ya baridi au kiangazi. Hali ya hewa ikiwa nzuri mayai yaendelea kupevuka halafu tunutu wanatoka. Tunutu (panzi wachanga) waambua ngozi zao mara tano mpaka mara saba kufuatana na aina yao. Kila hatua ya ukuaji ni kubwa kuliko ile iliyotangulia. Wakati wa uambuaji wa mwisho panzi mkubwa atokea na kuwa mpevu ndani ya siku au wiki chache.

Kuna wadudu ambao wanafanana na panzi lakini wana vipapasio virefu kuliko mwili wao. Aina moja kati yao anaitwa senene na huliwa na watu. Jike ana umbile kama mfuo kinachofanana na kitara. Anataga mayai juu ya au ndani ya mimea.

Panzi huliwa sehemu nyingi duniani kwa sababu wana virutubisho (protini) vingi. Wanajeshi huambiwa wakamate panzi na kuwala wakipungukiwa chakula.