To Wong Foo, Thanks for Everything! Julie Newmar

To Wong Foo, Thanks for Everything! Julie Newmar
Imeongozwa na	Beeban Kidron
Imetayarishwa na	G. Mac Brown
Imetungwa na	Douglas Carter Beane
Nyota	Wesley Snipes Patrick Swayze John Leguizamo Stockard Channing Blythe Danner Arliss Howard Chris Penn
Muziki na	Rachel Portman
Imehaririwa na	Andrew Mondshein
Imesambazwa na	Universal Pictures
Imetolewa tar.	Septemba 8, 1995 (1995-09-08)
Ina muda wa dk.	Dakika 105
Nchi	Marekani
Lugha	Kiingereza
Bajeti ya filamu	Dola milioni 30
Mapato yote ya filamu	Dola milioni 47.7

To Wong Foo, Thanks for Everything! Julie Newmar ni filamu ya vichekesho na maigizo kutoka nchini Marekani iliyotoka mwaka 1995. Filamu hii iliongozwa na Beeban Kidron na mastaa wakuu ni Wesley Snipes, Patrick Swayze, na John Leguizamo. Ndani ya filamu hii, watatu hawa wanacheza kama drag queen (wanaume wanaovaa na kuigiza kama wanawake) kutoka jijini New York City ambao wanaamua kufanya safari kwenda pande mbalimbali za Marekani kwa njia ya barabara. Jina la filamu hii linatokana na ujumbe uliopo kwenye picha yenye saini ya mwigizaji Julie Newmar waliyokuwa wakiibeba kwenye safari yao; Newmar mwenyewe anaonekana kwa sekunde chache mwishoni mwa filamu hii.

Filamu hii ilisambazwa na kampuni ya Universal Pictures na kuingizwa sokoni tarehe 8 Septemba 1995. Ilifanya vizuri sana sokoni ambapo iliongoza kwenye mauzo ya tiketi Amerika Kaskazini kwa wiki mbili mfululizo, na kuingiza jumla ya dola milioni 47.8 duniani kote dhidi ya bajeti yake ya dola milioni 30. Wakosoaji wa filamu walitoa maoni mseto; wapo walioeleza hadithi yake kuwa ya kawaida mno, lakini uigizaji wa Swayze, Snipes, na Leguizamo ulisifiwa kwa kiwango cha juu. Baadaye, filamu hii ilikuja kuwa maarufu na kupendwa sana na jamii ya LGBT. Katika ugawaji wa Tuzo za Golden Globe za 53, Patrick Swayze aliteuliwa kuwania tuzo ya Mwigizaji Bora wa Kiume, huku John Leguizamo akiteuliwa kama Mwigizaji Bora Msaidizi.

Hata hivyo, mcheza gofu maarufu na mwanachama wa World Golf Hall of Fame, Juan Antonio "Chi-Chi" Rodríguez, aliishtaki Universal Pictures kwa kudai filamu hiyo ilichafua jina lake kwasababu jina lake lilitumika kama jina la mhusika mmoja wa kike. Baadaye pande zote mbili zilimaliza kesi hiyo nje ya mahakama kwa makubaliano ya siri.

Muhtasari wa hadithi

Baada ya Noxeema Jackson na Vida Boheme kushinda kwa pamoja shindano la "Drag Queen of the Year" mjini New York City, wanapata tiketi ya kwenda Hollywood kushiriki shindano kubwa zaidi la kitaifa la "Drag Queen of America". Kabla ya kuanza safari, Vida anamshawishi Noxeema wamfadhili na kuondoka na Chi-Chi Rodriguez, kijana mdogo mwanafunzi wao ambaye bado hana uzoefu kwenye sanaa hiyo ili wakamwongezee ujuzi.

Ili kufanya safari iwe ya kijanja zaidi, wanauza tiketi zao za ndege kwa rafiki yao mmoja na kutumia hela hizo kununua gari kuukuu la wazi aina ya Cadillac DeVille (toleo la mwaka 1967) lenye rangi ya njano. Wanafunga safari kuelekea Los Angeles wakiwa wamebeba picha ya ukutani ya mwanamitindo Julie Newmar yenye ujumbe uliosomeka: “To Wong Foo, Thanks for Everything! Julie Newmar”.

Wakiwa njiani, wanasimamishwa na askari Dollard (Sheriff Dollard) ambaye anaanza kuwatolea maneno ya kibaguzi na kujaribu kumshika adabu Vida akidhani ni mwanamke. Vida anampiga ngumi moja matata na askari huyo anaanguka chini na kupoteza fahamu. Wakidhani kuwa wamemuua, wanaingia kwenye gari na kukimbia eneo hilo kwa kasi. Gari lao linakuja kufia mbele kidogo karibu na kijiji cha mbali kiitwacho Snydersville, ambapo kijana mmoja mkarimu aitwaye Bobby Ray anawabeba na kuwatafutia chumba cha kufikia.

Wakiwa hapo kijijini, wanakutana na wanawake wengi wa kijijini hapo wanaonyanyasika na wenye maisha ya upweke. Wageni hawa wanaamua kuleta mabadiliko; wanawafanyia wanawake hao mapambo ya sura, kuwasuka nywele mpya, kuwabadilishia nguo na kuwarudishia furaha ya maisha, huku wakishiriki pia kuandaa tamasha la kila mwaka la kijiji hicho. Chi-Chi naye anapata usumbufu kutoka kwa wahuni wa hapo kijijini lakini Bobby Ray anasimama naye kidete kumtetea.

Mambo yanazidi kuwa moto pale Vida anapogundua kuwa Carol Ann (mwanamke wa nyumba waliyofikia) anapigwa mara kwa mara na mume wake Virgil. Usiku mmoja, Vida anamfumania Virgil akimshushia kipigo mke wake, anaingilia kati na kumtembezea Virgil kichapo cha mbwa mwizi hadi anamfukuza mazima kwenye nyumba hiyo. Carol Ann anawashukuru sana na anafanikiwa kuwatengenezea gari lao lililokuwa limeharibika.

Ghafla, Askari Dollard anatia timu pale kijijini akiwa na uchu wa kulipa kisasi na kuwakamata wabaya wake. Lakini kumbe wanakijiji wote wa Snydersville washaongeza upendo na kuwa marafiki wakubwa wa wageni hao; wanaamua kuwakingia kifua. Askari huyo anapohoji drag queen yupo wapi, wanakijiji wote (wanaume kwa wanawake) mmoja baada ya mwingine wananyasuka na kusema, "Mimi ndiye drag queen!" Kitendo hiki kinamchanganya akili Dollard na kumfanya aondoke kwa aibu kubwa huku akichekwa.

Mwishoni mwa picha, Noxeema, Vida, na Chi-Chi wanasepa zao salama hadi Los Angeles. Chi-Chi, ambaye sasa ameshakuwa mtaalamu na kuiva vizuri kupitia mafunzo ya wenzake, anafanikiwa kushinda taji la "Drag Queen of the Year". Taji hilo anakabidhiwa jukwaani na Julie Newmar mwenyewe huku shangwe zikitawala.

Waigizaji

• Wesley Snipes kama Noxeema Jackson
• Patrick Swayze kama Vida Boheme
• John Leguizamo kama Chi-Chi Rodriguez
• Stockard Channing kama Carol Ann
• Blythe Danner kama Beatrice
• Arliss Howard kama Virgil
• Jason London kama Bobby Ray
• Chris Penn kama Sheriff Dollard
• Melinda Dillon kama Merna
• Beth Grant kama Loretta
• Alice Drummond kama Clara
• Marceline Hugot kama Katina
• Jennifer Milmore kama Bobby Lee
• Jamie Harrold kama Billy Budd
• Mike Hodge kama Jimmy Joe
• Michael Vartan kama Tommy

Waigizaji waliojitokeza kwa muda mfupi

• RuPaul kama Rachel Tensions
• Julie Newmar kama yeye mwenyewe
• Naomi Campbell kama msichana katika China Bowl
• Miss Understood kama yeye mwenyewe
• Joey Arias kama Justine
• Catiria Reyes kama yeye mwenyewe
• Miss Coco Peru kama yeye mwenyewe
• Quentin Crisp kama jaji wa mashindano ya New York
• Susanne Bartsch kama jaji wa mashindano ya New York
• Widow Norton kama jaji wa mashindano ya New York
• Candis Cayne kama yeye mwenyewe
• Hedda Lettuce kama yeye mwenyewe
• Robin Williams kama John Jacob Jingleheimer Schmidt
• Lady Bunny kama yeye mwenyewe

Viungo vya nje

• To Wong Foo, Thanks for Everything! Julie Newmar at the Internet Movie Database