Lior Rosner

Lior Rosner ni mtunzi wa muziki wa filamu, televisheni na muziki wa klasiki, pamoja na kuwa kondakta mzaliwa wa Israel.

Rosner alitunga muziki wa utambulisho wa kipindi cha The Ellen DeGeneres Show. Aliteuliwa kuwania tuzo ya International Film Music Critics Association (IFMCA) kupitia wimbo wa "They’ll Remember You," ambao ni onyesho la kwaya na okestra lililotumika mwishoni mwa filamu ya Valkyrie.

Maisha ya Awali

Rosner alizaliwa nchini Israel na kuhitimu shahada ya utungaji wa muziki na nadharia kutoka chuo cha Jerusalem Academy of Music and Dance. Alihamia Los Angeles, Marekani, ambapo aliendelea na masomo ya muziki katika chuo cha UCLA, na masomo ya uongozaji okestra katika chuo cha USC Thornton School of Music.

Kazi yake ya utungaji wa muziki wa filamu ilianzia katika kampuni ya Fox Entertainment Group, ambapo alitunga muziki kwa zaidi ya vipindi 200 vya watoto na filamu mbalimbali. Baada ya hapo, alijitegemea na kutunga muziki kwa ajili ya Disney/ABC Television Group.

Kazi za Filamu na Televisheni

Lior Rosner amechangia katika utungaji na upangaji wa muziki kwenye filamu nyingi maarufu, zikiwemo X-Men: Days of Future Past, Valkyrie, Little Fockers, na The Losers. Wimbo wake wa kwaya, "They’ll Remember You," uliotumiwa kwenye filamu ya Valkyrie iliyoigizwa na Tom Cruise, uliteuliwa kuwania tuzo ya World Soundtrack Award.

Katika televisheni, amefanya kazi kwenye mfululizo wa Netflix wa Q-Force, AJ and the Queen, na msimu mpya wa Will & Grace wa NBC, ambapo aliboresha muziki wa utambulisho wa kipindi hicho na kupata tuzo kadhaa za ASCAP. Pia alitunga muziki wa The History of Comedy ya CNN na Battle Creek.

Rosner pia alitunga kazi ya okestra iitwayo Sugar Plum on the Run, iliyotolewa na Sony Classical, ambayo inashirikisha okestra ya Royal Philharmonic Orchestra na usimulizi wa Jeremy Irons.

Michezo ya Video na Matangazo

Rosner aliandika muziki wa michezo ya video ya Sony kama vile SOCOM Fireteam Bravo 3 na Syphon Filter: Dark Mirror. Aidha, amehusika katika kutengeneza muziki wa vionjo (trailers) vya filamu na mfululizo maarufu kama Game of Thrones, The Imitation Game, Paddington, Harry Potter and the Deathly Hallows – Part 2, na Toy Story 3.

Vilevile, ametengeneza muziki wa matangazo ya biashara kwa kampuni kubwa kama Mercedes-Benz, Campari, na Hitachi.

Muziki wa Klasiki

Mbali na kazi za filamu, Rosner anaendelea kutunga muziki wa klasiki. Albamu yake ya hivi karibuni, Awake and Dream, inashirikisha mwimbaji wa soprano Janai Brugger na okestra ya Hollywood Studio Symphony. Kazi zake zimekuwa zikichezwa mubashara na vikundi kama Armadillo String Quartet na Kaleidoscope Orchestra.