Gloria Estefan

Gloria Estefan
Estefan mwaka 2017
Amezaliwa	1 Septemba 1957 (1957-09-01) Havana, Kuba
Kipindi	1975–sasa
Watoto	2 (akiwemo Emily Estefan)
Mahusiano	Lili Estefan (mpwa)
Tovuti	ritaora.com

Gloria María Milagrosa Estefan (alizaliwa Septemba 1, 1957) ni mwimbaji, mtunzi wa nyimbo, mwigizaji, na mfanyabiashara wa nchi ya Marekani aliyezaliwa nchini Kuba. Estefan ameshinda Tuzo za Grammy mara tano na ni mpokeaji wa Nishani ya Uhuru ya Rais (Presidential Medal of Freedom), na ametajwa kuwa mmoja wa wasanii 100 bora wa muda wote na vituo vya VH1 na Billboard. Mauzo ya rekodi za Estefan yanazidi nakala milioni 120 duniani kote, jambo linalomfanya kuwa mmoja wa wasanii wa muziki waliouza rekodi nyingi zaidi wa muda wote.

Akiwa na sauti ya contralto (sauti ya chini ya kike), Estefan alianza kazi yake kama mwimbaji mkuu wa kikundi cha Miami Latin Boys, ambacho baadaye kilibadilishwa jina na kuwa Miami Sound Machine. Yeye na kikundi cha Miami Sound Machine walipata mafanikio makubwa duniani kote kupitia wimbo wao wa mwaka 1985 uiitwao "Conga", ambao ukawa wimbo uliotambulisha utambulisho wake wa kimuziki. Kikundi hicho kilifuatia na nyimbo zingine nyingi zilizovuma katika muongo huo, zikiwemo "Anything for You", "1-2-3", "Bad Boy", na "Rhythm Is Gonna Get You". Kikundi hicho kilipewa jina jipya la Gloria Estefan and Miami Sound Machine kufuatia kutoka kwa albamu yao ya mwaka 1987 ya Let It Loose, na mnamo mwaka 1989, Estefan alipata umaarufu mkubwa kama msanii wa kujitegemea kupitia albamu yake ya kwanza ya solo, Cuts Both Ways.

Mnamo Machi 1990, Estefan alipata majeraha ya hatari baada ya kuvunjika kwa uti wa mgongo wa shingo (cervical fracture) wakati basi lake la ziara ya kimuziki lilipopata ajali karibu na Scranton, Pennsylvania nchini Marekani. Alifanyiwa upasuaji wa dharura na kupona kabisa. Mwaka uliofuata, Estefan alirejea tena kwenye muziki kwa kufanya ziara ya kimataifa na kutoa albamu ya Into the Light. Albamu ya Estefan ya lugha ya Kihispania ya mwaka 1993, Mi Tierra, ilimwezesha kushinda tuzo ya kwanza kati ya Tuzo zake tatu za Grammy katika kategoria ya Albamu Bora ya Muziki wa Kilatino wa Kitropiki. Albamu hiyo pia ilikuwa albamu ya kwanza kufikia hadhi ya Almasi (Diamond) nchini Hispania. Orodha ya nyimbo zake zilizovuma kimataifa kama msanii wa kujitegemea ni pamoja na "Don't Wanna Lose You", "Get On Your Feet", "Coming Out of the Dark", "Turn the Beat Around", "You'll Be Mine (Party Time)", na "Heaven's What I Feel".

Estefan ametunukiwa nyota kwenye Ukumbi wa Umaarufu wa Hollywood (Hollywood Walk of Fame) na Ukumbi wa Umaarufu wa Las Vegas, na alikuwa mpokeaji wa Tuzo za Heshima za kituo cha sanaa za maonyesho cha Kennedy Center (Kennedy Center Honors) mnamo mwaka 2017 kwa mchango wake katika maisha ya kitamaduni ya Marekani. Estefan alishinda tuzo ya MTV Video Music Award, alitunukiwa Tuzo ya Muziki ya Amerika (American Music Award) kwa Mafanikio ya Maisha na ametajwa kuwa Mtunzi wa Mwaka wa BMI ambalo ni shirika la kulinda hakimiliki nchini Marekani. Aliingizwa kwenye Ukumbi wa Umaarufu wa Watunzi wa Nyimbo (Songwriters Hall of Fame) na amepokea Tuzo nyingi za Muziki za Billboard (Billboard Music Awards). Pia, ni mpokeaji wa Nishani ya Uhuru ya Rais ya mwaka 2015, ambayo alitunukiwa na Rais wa Marekani wa kipindi hicho, Barack Obama.

Jarida la Billboard limemweka Estefan kama mwanamke wa pili wa Kiamerika mwenye asili ya Kilatino aliyepata mafanikio makubwa zaidi, na msanii wa 23 wa Kilatino bora wa muda wote nchini Marekani, kulingana na chati za albamu na nyimbo za Kilatino. Akitajwa na vyombo vya habari kama "Malkia wa Muziki wa Pop wa Kilatino" (Queen of Latin Pop) na "Mama wa Muziki wa Pop wa Kilatino", amekusanya nyimbo 38 zilizoshika nafasi ya kwanza kwenye chati za Billboard, ikijumuisha nyimbo 15 zilizoongoza kwenye chati ya Hot Latin Songs.