Fredrick Shoo

Fredrick Onael Shoo
Amezaliwa	10 Machi 1959 Kilimanjaro, Tanzania
Nchi	Tanzania
Majina mengine	"Askofu wa Mazingira"
Kazi yake	Askofu, Mwanateolojia

Fredrick Onael Shoo ni kiongozi mwandamizi wa dini nchini Tanzania aliyekuwa Mkuu wa Kanisa la Kiinjili la Kilutheri Tanzania (KKKT) kuanzia mwaka 2015 hadi Januari 2024. Pia ni Askofu wa Dayosisi ya Kaskazini (Moshi). Anafahamika kimataifa kwa jitihada zake za kupambana na mabadiliko ya tabianchi.

Maisha ya Awali na Elimu

Askofu Shoo alizaliwa mkoani Kilimanjaro. Alipata elimu yake ya teolojia nchini Tanzania na baadaye nchini Ujerumani ambako alitunukiwa Shahada ya Uzamivu (Ph.D.). Elimu yake nchini Ujerumani ilimsaidia kujenga mahusiano ya karibu kati ya KKKT na makanisa ya Kilutheri ya Ulaya na duniani kote kupitia Shirikisho la Kilutheri Duniani (LWF).

Uongozi wa Kanisa

Mnamo mwaka 2015, alichaguliwa kuwa Mkuu wa Kanisa la KKKT akichukua nafasi ya Askofu Alex Malasusa. Chini ya uongozi wake:

• Alisimamia umoja ndani ya dayosisi 28 za kanisa hilo nchini Tanzania.
• Aliongoza maadhimisho ya miaka 500 ya Matengenezo ya Kanisa (Reformation) mwaka 2017.
• Alijulikana kwa kutoa matamko ya kijamii na kisiasa yaliyolenga kuhimiza haki, amani, na utawala bora nchini Tanzania.

Harakati za Mazingira

Askofu Shoo amepata umaarufu mkubwa kama "Askofu wa Miti". Amekuwa akihimiza waumini na wananchi kwa ujumla kupanda miti kama sehemu ya ibada na utunzaji wa mazingira. Jitihada zake zimelenga zaidi kuokoa barafu za Mlima Kilimanjaro zinazotoweka kutokana na ongezeko la joto duniani. Kupitia kampeni zake, mamilioni ya miti yamepandwa mkoani Kilimanjaro.

Kustaafu

Mnamo mwezi Januari 2024, Askofu Shoo aling'atuka katika nafasi ya Mkuu wa Kanisa (KKKT) baada ya kumaliza muda wake kisheria na kumkabidhi kijiti Askofu Alex Malasusa. Anaendelea na utumishi wake kama Askofu wa Dayosisi ya Kaskazini.