Anne Waiguru

Anne Mūmbi Waigūrū (alizaliwa 16 Aprili 1971) ni Gavana wa pili wa Kaunti ya Kirinyaga, nchini Kenya, ambaye amekuwa madarakani tangu mnamo 22 Agosti 2017, na kwa sasa yuko katika muhula wake wa pili.

Safari ya kisiasa

Waigūrū aliweka historia katika Uchaguzi Mkuu wa mwaka 2017 alipokuwa, pamoja na Charity Ngilu na marehemu Joyce Laboso, miongoni mwa magavana wanawake wa kwanza kuchaguliwa nchini Kenya tangu kuanzishwa kwa mfumo wa ugatuzi baada ya Katiba ya mwaka 2010. Alichaguliwa tena kuwa Gavana kwa muhula wake wa pili wa miaka mitano katika uchaguzi uliofanyika tarehe 9 Agosti 2022.

Hapo awali, alihudumu kama Katibu wa Baraza la Mawaziri wa kwanza katika Wizara ya Ugatuzi na Mipango , baada ya kuteuliwa na Rais Uhuru Kenyatta tarehe 25 Aprili 2013. Baadaye, alijiuzulu wadhifa huo mwaka 2015 kufuatia tuhuma za rushwa katika sakata la National Youth Service (NYS) la mwaka 2015, ambapo kiasi cha shilingi milioni 791 za Kenya (Ksh. 791 million) kilidaiwa kupotea.

Mwaka 2016, alimhusisha aliyekuwa Kiongozi wa Wengi katika Bunge la Kitaifa, Aden Duale, msaidizi binafsi wa William Ruto, Faruk Kibet, na Kipchumba Murkomen, katika sakata hilo la rushwa kupitia hati ya kiapo (affidavit) aliyowasilisha katika Mahakama Kuu. Hakukuwa na uchunguzi uliofanyika dhidi ya watu hao watatu, nao wote walikanusha tuhuma hizo. Hatimaye, Waigūrū alisafishwa na Tume ya Maadili na Kupambana na Rushwa mwezi Februari 2016 dhidi ya mashtaka yote. Hata hivyo, mwezi Machi 2016, Mwenyekiti wa EACC Phillip Kinisu alisema kulikuwa na makosa katika uamuzi wa kumsafisha Waigūrū, akieleza kuwa makosa hayo yalitokana na hitilafu za mawasiliano kati ya taasisi za serikali.

Waigūrū pia anahusishwa na kuanzishwa kwa Huduma Centres, vituo vinavyowawezesha raia wa Kenya kupata huduma za serikali kwa ufanisi zaidi katika kaunti zao. Aidha, alichangia kuanzishwa kwa kanuni ya asilimia 30 ya ununuzi wa serikali, inayotenga angalau asilimia 30 ya zabuni za serikali kwa vijana, watu wenye ulemavu, na wanawake.

Katika Uchaguzi Mkuu wa Kenya wa tarehe 9 Agosti 2022, Waigūrū alikuwa miongoni mwa magavana wanawake saba (G-7) waliochaguliwa. Magavana wengine wanawake ni Susan Kihika (Kaunti ya Nakuru), Gladys Wanga (Kaunti ya Homa Bay), Cecily Mutitu Mbarire (Kaunti ya Embu), Wavinya Ndeti (Kaunti ya Machakos), Fatuma Achani (Kaunti ya Kwale), na Kawira Mwangaza (Kaunti ya Meru). Hii ndiyo idadi kubwa zaidi ya wanawake katika nafasi ya ugavana tangu kuanzishwa kwa mfumo wa ugatuzi mwaka 2013. Katika uchaguzi wa mwaka 2017, ni wanawake watatu pekee ndio waliochaguliwa kuwa magavana kati ya jumla ya magavana 47.

Waigūrū alikuwa Makamu Mwenyekiti wa kwanza mwanamke wa Baraza la Magavana nchini Kenya kuanzia Desemba 2017 hadi Januari 2019. Alichaguliwa kuwa Mwenyekiti wa Baraza la Magavana mwezi Septemba 2022, na kuwa mwanamke wa kwanza kushika wadhifa huo nchini Kenya.

Mwaka 2023, alichaguliwa tena kwa kauli moja kwa muhula wa pili kama Mwenyekiti wa Baraza la Magavana (COG) katika kikao kamili kilichofanyika Nairobi. Baada ya kuchaguliwa tena, Waigūrū alisema kuwa lengo lake kuu litakuwa kuhakikisha kuwa majukumu yote ya ugatuzi na rasilimali zake yanakabidhiwa kikamilifu kwa serikali za kaunti. Mwaka 2024, alikuwa miongoni mwa magavana wa G-7 waliotembelea Kaunti ya Machakos kumuunga mkono Wavinya Ndeti.

Marejeo

Makala hii kuhusu mambo ya siasa bado ni mbegu. Je, unajua kitu kuhusu Anne Waiguru Unaweza kuisaidia Wikipedia kwa kuongezea habari Labda unaona habari katika Wikipedia ya Kiingereza au lugha nyingine zinazofaa kutafsiriwa? Basi unaweza kuisaidia Wikipedia kwa kuihariri na kuongeza habari.