Angeline Murimirwa

Angeline Murimirwa ni mwanaharakati wa ufeministi kutoka Zimbabwe, ambaye kwa sasa ni Afisa Mtendaji Mkuu wa CAMFED barani Afrika. Mwaka 2025, Murimirwa aliorodheshwa katika orodha ya TIME100 ya watu 100 wenye ushawishi mkubwa zaidi duniani.

Kazi

Murimirwa alizaliwa mwaka 1980 na alikulia katika kijiji cha Denhere, maeneo ya vijijini nchini Zimbabwe. Akiwa mtoto, alikumbana na changamoto za umasikini ambazo zilihatarisha elimu yake, lakini baadaye akapata ufadhili wa masomo kupitia shirika la CAMFED. Katika miaka ya 1990, Murimirwa alikuwa miongoni mwa wasichana wa kwanza kunufaika na mpango wa ufadhili wa CAMFED uliolenga kusaidia elimu ya sekondari kwa wasichana wa vijijini. Msaada huo ulijumuisha ada za shule, sare, viatu na vifaa vya masomo. Baada ya kumaliza masomo yake, Murimirwa alijikita katika kazi za maendeleo ya jamii na baadaye akajiunga na CAMFED kama kiongozi. Alipanda ngazi hadi kuwa Mkurugenzi Mtendaji wa kikanda wa Afrika Kusini na Mashariki, kabla ya kuteuliwa kuwa Afisa Mtendaji Mkuu wa CAMFED Afrika. Mwaka 1998, Murimirwa alisaidia kuanzishwa kwa CAMFED Association (CAMA), mtandao wa wanawake waliowahi kufadhiliwa na CAMFED. Mtandao huo ulianza na wanachama wachache lakini umeongezeka hadi zaidi ya wanawake 312,747 kufikia mwaka 2025. Kupitia CAMA, wanawake vijana hupewa mafunzo ya uongozi, ujasiriamali na uhamasishaji wa elimu katika jamii zao, na hivyo kuwa mabalozi wa mabadiliko katika maeneo yao.

Murimirwa amewahi kuzungumza katika majukwaa mbalimbali ya kimataifa, yakiwemo Global Exchange (2005), ambapo alijadili umuhimu wa uwezeshaji wa wanawake. Mwaka 2006 alitunukiwa tuzo ya *Women's Creativity in Rural Life* na Women's World Summit Foundation kutokana na mchango wake katika maendeleo ya wanawake vijijini. Mwaka 2009, alitajwa katika kitabu maarufu cha Half the Sky cha Sheryl WuDunn na Nicholas Kristof, ambacho kinachambua changamoto za wanawake duniani na uwezo wao wa kubadilisha jamii. Mwaka 2014, alishiriki katika hafla ya kimataifa pamoja na Michelle Obama, ambapo alisisitiza umuhimu wa elimu ya wasichana kama njia ya kupunguza umaskini na kuleta usawa wa kijinsia. Mwaka 2016, alihudhuria tukio la CAMFED ambapo aliyekuwa Waziri Mkuu wa Australia, Julia Gillard, alikubali kuwa msaidizi (patron) wa shirika hilo. Murimirwa alisisitiza kuwa suluhisho la elimu linapaswa kujengwa kwa kuzingatia mazingira ya ndani ya jamii.

Mwaka 2017, aliorodheshwa katika BBC 100 Women kama mmoja wa wanawake 100 wenye ushawishi mkubwa duniani. Pia alitunukiwa tuzo ya *Diamond Ball Honors Award* na Clara Lionel Foundation, ambapo alitoa hotuba kuhusu safari yake kutoka umasikini hadi uongozi wa kimataifa. Mwaka 2018, alikutana na Prince Harry wakati wa ziara ya kifalme nchini Zambia kujadili maendeleo ya elimu ya wasichana. Mwaka 2019, alitoa TED Talk yenye kichwa *“How repaying loans with social service transforms communities”*, akieleza jinsi huduma kwa jamii inavyoweza kubadilisha maisha ya vijana. Mwaka 2020, alitunukiwa Yidan Prize for Education Development kwa mchango wake katika kukuza elimu ya wasichana barani Afrika. Mwaka 2023, alitoa TED Talk ya pili yenye mada *“School is just the start. Here's how to help girls succeed for life”*, akisisitiza kuwa elimu ya darasani pekee haitoshi bila msaada wa kijamii. Mwaka 2024, Murimirwa alishinda Africa Education Medal kwa kutambuliwa kama kiongozi anayebadilisha sekta ya elimu barani Afrika kupitia kazi yake na CAMFED.