Amal Clooney

Amal Clooney
Clooney mnamo mwaka 2022
Amezaliwa	Amal Alamuddin 3 Februari 1978 (1978-02-03)
Uraia	Uingereza, Lebanon, Ufaransa
Miaka ya kazi	2000–hadi sasa
Mwenza	George Clooney (m. –present) «Not recognized as a date. Years must have 4 digits (use leading zeros for years < 1000).»"Marriage: George Clooney to Amal Clooney" Location: (linkback://sw.wikipedia.org/wiki/Amal_Clooney)
Watoto	2

Amal Clooney (jina la kuzaliwa Alamuddin; alizaliwa (1978-02-03)3 Februari 1978) ni mwanasheria wa kimataifa wa haki za binadamu mwenye asili ya Lebanon na Uingereza. Amewahi kuwawakilisha wateja mbalimbali mashuhuri, wakiwemo rais wa zamani wa Maldivi Mohamed Nasheed, mwanzilishi wa WikiLeaks Julian Assange, waziri mkuu wa zamani wa Ukraine Yulia Tymoshenko, mwanaharakati wa haki za binadamu wa Yazidi Nadia Murad, mwandishi wa habari Mfilipino-Mmarekani Maria Ressa, mwandishi wa habari wa Azerbaijan Khadija Ismayilova, na mwandishi wa habari wa Misri-Canada Mohamed Fahmy.

Clooney ni profesa wa sheria ya kimataifa katika Shule ya Serikali ya Blavatnik (Blavatnik School of Government) katika Chuo Kikuu cha Oxford na mshirika mwandamizi katika Taasisi ya Teknolojia na Haki ya Oxford (Oxford Institute of Technology and Justice), taasisi aliyoanzisha kwa ushirikiano ili kutumia nguvu ya akili mnemba (AI) katika kuongeza fursa za upatikanaji wa haki.

Maisha ya awali na elimu

Amal Alamuddin alizaliwa huko Beirut, Lebanon, mnamo tarehe 3 Februari 1978. Baba yake ni wa asili ya Wadruze wa Lebanon na mama yake ni Mwislamu wa dhehebu la Sunni kutoka Tripoli. Alipokuwa na umri wa miaka miwili, familia yake ilihamia nchini Uingereza ili kukimbia Vita vya Wenyewe kwa Wenyewe vya Lebanon, na walikaa huko Gerrards Cross katika jimbo la Buckinghamshire. Ana ndugu watatu: dada mmoja (Tala Alamuddin) na kaka wawili wa kambo waliozaliwa kwenye ndoa ya kwanza ya baba yake..

Clooney alisoma katika Shule ya Sekondari ya Dr Challoner (Dr Challoner's High School), shule ya wasichana ya mchepuo wa sarufi iliyopo Little Chalfont, Buckinghamshire. Baadaye alisoma katika Chuo cha St Hugh cha Oxford (St Hugh's College, Oxford), ambapo alitunukiwa ufadhili wa masomo na Tuzo ya Shrigley. Mnamo mwaka 2000, alihitimu shahada ya kwanza ya sheria yenye hadhi ya daraja la pili la juu na kwa sasa ni mwanachama wa heshima wa chuo hicho cha St Hugh.

Baada ya hapo, alijiunga na Shule ya Sheria ya Chuo Kikuu cha New York (New York University School of Law) kwa ajili ya masomo ya Shahada ya Uzamili ya Sheria (LLM). Alipata Tuzo ya Ukumbusho ya Jack J. Katz kwa umahiri wake katika sheria ya burudani. Alipokuwa chuoni hapo, alifanya kazi kwa muhula mmoja katika ofisi ya mwanasheria na jaji wa Marekani Sonia Sotomayor, ambaye wakati huo alikuwa jaji wa Mahakama ya Rufani ya Marekani kwa Mzunguko wa Pili na mmoja wa wakufunzi wa sheria wa NYU.

Kazi ya sheria

Clooney (kulia) akiwa na waziri wa mambo ya nje wa Canada Chrystia Freeland kwenye Mkutano wa Kimataifa wa Uhuru wa Vyombo vya Habari huko London, 2019

Clooney ana sifa na vibali vya kufanya kazi ya sheria katika jimbo la New York pamoja na nchi za Uingereza na Wales. Alisajiliwa katika Chama cha Mawakili cha New York mnamo mwaka 2002. Mnamo mwaka 2010, alitambuliwa rasmi kama wakili nchini Uingereza na Wales kupitia taasisi ya Inner Temple. Ni wakili anayefanya kazi katika chemba za Doughty Street Chambers. Pia amewahi kufanya uwakili katika Mahakama ya Kimataifa ya Haki (ICJ) na Mahakama ya Kimataifa ya Jinai (ICC) huko The Hague. Alifanya kazi katika kampuni ya sheria ya Sullivan & Cromwell jijini New York kwa miaka mitatu chini ya Kundi la Utetezi wa Jinai na Uchunguzi, ambapo baadhi ya wateja wake walikuwa makampuni ya Enron na Arthur Andersen. Mnamo mwaka 2024, Clooney alitunukiwa tuzo ya mwanasheria bora wa mwaka ya Legal 500 kwa kutambua kazi na mchango wake mkubwa katika nyanja ya sheria za kimataifa.

Clooney alihitimu mafunzo ya ukatibu wa kisheria wa jaji katika Mahakama ya Kimataifa ya Haki mnamo mwaka 2004, akifanya kazi chini ya majaji Vladlen S. Vereshchetin kutoka Urusi, Nabil Elaraby kutoka Misri, na jaji wa dharura Franklin Berman kutoka Uingereza. Baadaye alihamia The Hague kufanya kazi katika Mahakama ya Kimataifa ya Jinai ya zamani ya Yugoslavia, ambapo alikuwa msaidizi wa kisheria wa jaji mkuu Patrick Robinson. Kesi hiyo ilikuwa inamkabili Slobodan Milosevic, rais wa zamani wa Jamhuri ya zamani ya Yugoslavia, aliyetuhumiwa kwa makosa ya jinai yaliyotendeka huko Kosovo, Croatia, na Bosnia wakati wa vita vya zamani vya Yugoslavia. Clooney pia alifanya kazi kama mwendesha mashtaka katika Mahakama Maalum ya Lebanon. Aliongoza kesi dhidi ya wanachama watano wa kundi la Hezbollah, waliositakiwa kwa kuhusika na mauaji ya waziri mkuu wa zamani wa Lebanon Rafic Hariri na watu wengine mnamo mwaka 2005.

Maisha binafsi

Clooney akiwa na mume wake George Clooney mnamo mwaka 2022.

Clooney ana uraia wa nchi za Uingereza, Lebanon, na Ufaransa. Anazungumza kwa ufasaha lugha ya Kiingereza na Kifaransa, na pia ana uwezo wa kuzungumza Kiarabu cha Lebanon.

Mnamo tarehe 28 Aprili 2014, alichumbiwa na mwigizaji wa Marekani George Clooney, ambaye walikutana kwa mara ya kwanza kupitia rafiki yao wa pamoja mnamo Julai 2013. Mnamo tarehe 7 Agosti 2014, wawili hao walipata leseni ya ndoa katika Manispaa ya Kifalme ya Kensington na Chelsea (Royal Borough of Kensington and Chelsea) jijini London. Siku mbili baada ya sherehe yao kubwa ya harusi, walifunga ndoa rasmi mnamo tarehe 27 Septemba 2014 huko Ca' Farsetti katika jiji la Venice; walifungishwa ndoa na rafiki wa karibu wa Clooney, Walter Veltroni, mwanasiasa wa Italia aliyewahi kuwa Naibu Waziri Mkuu wa Italia kati ya mwaka 1996 na 1998 pamoja na kuwa Meya wa Roma kati ya mwaka 2001 na 2008. Mnamo Oktoba 2014, ilitangazwa kuwa familia hiyo ya Clooney ilikuwa imenunua jumba la Mill House lililopo kwenye kisiwa cha Mto Thames huko Sonning Eye kwa gharama ya takriban pauni milioni 10.

Mnamo Februari 2017, kipindi cha televisheni cha Marekani cha The Talk kiliripoti kuwa Clooney alikuwa na ujauzito. Mwigizaji wa Marekani Matt Damon, ambaye ni rafiki wa karibu wa familia hiyo, alithibitisha ujauzito huo kupitia kipindi cha Entertainment Tonight muda mfupi baadaye. Mnamo Juni 2017, Clooney alijifungua watoto pacha wasiofanana, yaani: msichana na mvulana.

Viungo vya nje

Wikimedia Commons ina media kuhusu:

Amal Clooney

• Amal Clooney katika Doughty Street Chambers
• Amal Clooney at the Internet Movie Database
• Kigezo:C-SPAN