Papa Paulo VI

Kutoka Wikipedia, kamusi elezo huru
Rukia: urambazaji, tafuta
Papa Paulo VI.

Papa Paulo VI (26 Septemba 18976 Agosti 1978) alikuwa papa kuanzia tarehe 21 Juni 1963 hadi kifo chake.

Jina lake la kuzaliwa lilikuwa Giovanni Battista Enrico Antonio Maria Montini.

Alimfuata Papa Yohane XXIII akafuatwa na Papa Yohane Paulo I.

Asili[hariri | hariri chanzo]

Alizaliwa Concesio, kijiji cha wilaya ya Brescia, katika mkoa wa Lombardia (Italia), ambapo familia Montini ilikuwa na nyumba ya kufanyia likizo.

Wazazi wake, wakili Giorgio Montini na Giuditta Alghisi, walifunga ndoa mwaka 1895 wakazaa watoto watatu: Ludovico, aliyepata kuwa mbunge, Giovanni Battista mwenyewe, na Francesco, daktari.

Papa huyo alipozaliwa, baba yake alikuwa mkurugenzi wa gazeti la Kikatoliki "Il Cittadino di Brescia", halafu akawa mbunge.

Malezi[hariri | hariri chanzo]

Mwaka 1903 alianza masomo yake kwa Wajesuiti.

Mwaka 1907 alihiji Roma kwa mara ya kwanza pamoja na familia, ili kuonana na Papa Pius X, halafu akapewa sakramenti za ekaristi na Kipaimara.

Mwaka 1916 alimaliza sekondari akajiunga na seminari ya mji wake.

Upadrisho[hariri | hariri chanzo]

Tarehe 29 Mei 1920 alipewa upadrisho katika kanisa kuu la Brescia. Mwaka uleule akahamia Roma ili kusoma Sheria na Falsafa kwa wakati mmoja.

Mwaka 1923 alianza kuelekea diplomasia na kushirikiana na Ofisi za Papa, kwa agizo la Papa Pius XI. Baada ya kutumwa Warsav (Juni-Oktoba 1923), mwaka 1924 alipata digrii tatu.

Ushirikiano na Pio XI na Pio XII[hariri | hariri chanzo]

Baada ya kutimiza majukumu mengine, tarehe 13 Desemba 1937 alichaguliwa kuwa makamu wa Katibu wa Kanisa, Eugenio Pacelli, ambaye mwaka 1939 alichaguliwa kuwa Papa Pius XII.

Alimuunga mkono katika jitihada zake za kuzuia vita na kurudisha amani na za kuokoa uhai wa Wayahudi (huko Roma 4.000 waliokolewa na Kanisa kutoka mikono ya Wafashisti).

Baada ya vita vikuu vya pili alijitahidi kuepusha Italia na ukomunisti.

Askofu mkuu wa Milano[hariri | hariri chanzo]

Tarehe 1 Novemba 1954, alichaguliwa kuchunga Jimbo kuu la Milano akapewa daraja ya uaskofu tarehe 12 Desemba.

Huko alifaulu kuinua hali ya jimbo katika kipindi kigumu sana.

Ukardinali[hariri | hariri chanzo]

Baada ya kifo cha Pius XII, alichaguliwa badala yake, tarehe 28 Oktoba 1958, Papa Yohane XXIII, aliyemchagua kardinali wa kwanza kati ya wale aliowateua tarehe 15 Desemba 1958.

Chini ya Papa huyo, kardinali Montini alihusika sana na maandalizi ya Mtaguso wa pili wa Vatikano, hadi ulipofunguliwa tarehe 11 Oktoba 1962.

Mtaguso ulikatika tarehe 3 Juni 1963 kwa kifo cha Papa.

Upapa[hariri | hariri chanzo]

Mkutano wa makardinali ulichukua muda mfupi kumchagua Montini kuwa Papa, naye alijichagulia jina la Paulo VI, tarehe 21 Juni 1963.

Mbele ya mabadiliko ya harakaharaka ya ulimwengu, Paulo VI alishika msimamo wa kujadiliana na wote na kuelekeza mtaguso mkuu uendelee kwa msimamo huo.

Haikuwa rahisi kuimarisha Kanisa Katoliki katika mvutano uliojitokeza hasa baada ya mtaguso kati ya wasiokubali mabadiliko na waliotaka kubadili hata mambo ya msingi, lakini alifaulu kwa uvumilivu mkubwa.

Mtu mpole na wa aibu, mwenye elimu kubwa pamoja na maisha ya kiroho ya hali ya juu, alifungua kurasa mpya katika ekumeni, kama alipokubaliana na Patriarki Atenagora I wa Konstantinopoli kufuta hati za mwaka 1054 zilizotenganisha Wakatoliki na Waorthodoksi (1964).

Tarehe 14 Septemba 1965, alianzisha Sinodi ya Maaskofu na tarehe 8 Desemba 1965 alifunga rasmi mtaguso.

Safari[hariri | hariri chanzo]

Paulo VI alikuwa Papa wa kwanza kusafiri kwa ndege akaenda mpaka nchi ya mbali, akiwa wa kwanza kwenda Israeli na kutembelea mabara yote.

Afya yake iliharibika haraka mwaka 1978 ambapo alifariki tarehe 6 Agosti saa 3:40 usiku huko Castel Gandolfo, akiacha wasia mzuri sana.

Kesi ya kumtangaza Mwenye heri[hariri | hariri chanzo]

Kwa uamuzi wa Papa Yohane Paulo II, tarehe 11 Mei 1993, Kanisa la Roma lilifungua kesi ya kumtangaza Mwenye heri.

Tarehe 20 Desemba 2012 Papa Benedikto XVI alipitisha uamuzi wa kukiri ushujaa wa maadili yote ya Paulo VI, ambaye hivyo anastahili kuitwa "venerabilis".

Maandishi yake[hariri | hariri chanzo]

Mbali ya hati za mtaguso mkuu, Paulo VI alitoa nyaraka kuu saba:

Viungo vya nje[hariri | hariri chanzo]

Commons-logo.svg
Wikimedia Commons ina media kuhusu: